Xitay Jasuslirining Xelqaragha Uzarghan Zeherlik Tili
October 27, 2017 Leave a comment
-1-
Yéqindin buyan muhajirette yashawatqan uyghurlarda xitay jasuslirining türlük alaqe wasitiliri arqiliq aldash, zorlash we tehditlirige uchrash ehwali éghirlashqanliqi melum.
Igilishimizche bu ehwallar amérika, türkiye we yawropada yashawatqan uyghurlarda oxshash shekilde yüz bergen. Biz anglighuchilar teminligen awazliq höjjetlerni retlep töwendiki ortaq nuqtilarni tépip chiqtuq.
1-Tehdit sélish, wasite qilish we shérin sözlesh
2017-Yili awghusttin béri amérikada turuwatqan bir uyghur teminligen awaz höjjitige qarighanda xitay jasusliri mezkur uyghurgha özige ishleshni, bolmisa baliliri we ayalining tutqungha mehkum bolidighanliqini éytqan, hemde yardem bergüchi qiyapetke kiriwalghan. Hetta mezkur uyghurgha eger qaytip ketse, öziningmu tutqun bolidighanliqini éytip tehdit salghan. Mezkur uyghurni ya chetelde xatirjem turalmaydighan ya qaytip kételmeydighandek tuyghugha keltürüp rohi jehettin qiynighan.
Yuqiriqi anglighuchimizning éytishiche xitay jasusliri muhajirette yashawatqan uyghurlarni ündidar arqiliq tépip qoshuwalghan, uning chetellerdiki paaliyetlirige dair uchurlarni féyisbuktin tapqan.
Türkiyede yashawatqan anglighuchimiz teminligen awaz höjjitige qarighanda, xitay jasusi özining salahiyitini yoshurghan, yumshaq gep qilip ehwal igilimekchi bolghan, bolupmu uyghur jamaitining ehwaligha bekrek qiziqqan, yighilishlardin xewpsirigen.
Awaz höjjitidiki uchurlardin qarighanda özi türkiyede yashawatqan bu anglighuchimizning perzenti wetende tutulghan. Mezkur jasus shu balini wasite qilip ata-Ana bolghuchini istixbarat bilen teminleshke qiziqturghan.
Türkiyege köz tikken mezkur xitay jasusi bu yerde paaliyet qiliwatqan «sherqi türkistan maarip we hemkarliq jemiyiti» ge alahide qiziqqan. Shundaqla «sherqi türkistan islam partiyesi» qatarliq qoralliq küchlerning teshebbusliri we paaliyetliri heqqidimu melumat élishqa tirishqan.
Mezkur xewerning dawamini kéyinki qétimliq anglitishimizda dawamliq anglighaysiler.
(2)
Oqurmen teminligen
Xelqara axbaratlarda uyghur élining saqchi dölitige aylinip qalghanliqi otturigha qoyuluwatqan bügünki künde xitay jasuslirining tili uzitip muhajirette yashawatqan uyghurlarning diligha sanjiliwatqini melum bolmaqta. Ular téléfonda hetta amérikidiki uyghurlarnimu adem ewetip qayturup kéleleydighanliqi heqqide po atqan.
Aldinqi programmimizda amérika we türkiyede yashawatqan uyghurlar teminligen awazliq höjjetlerni anglatqan iduq. Bularda jasuslarning biwasite tehdit sélish, xotun- Balilarni wasite qilish we shirin-Suxen sözler bilen aldash qatarliq wasitiler bilen uyghurlarni özi bilen hemkarliq ornitishigha jelp qiliwatqanliqini delillendi. Bügünki programmimizda jasuslarning yene qandaq hélilerni qollanghanliqi teqdim qilinidu.
«Amérika baralmaydighan yer emes!»
Amérikadin téléfon söhbet xatirisini ewetip bergüchining éytishigha qarighanda, xitay jasus aldashtin sür körsitishke ötken. Özini uyghur aptonom rayonluq j x nazaritidin dep tonushturghan bu xadim bir qétimliq söhbette ismini ekber, esqer we ekrem dep üch xil atighan. U xitayning neqeder küchlük ikenlikini tekitlep her qandaq bir kishini qayturup kéleleydighanliqi heqqide wez éytqan.
«Yaxshiliq qilay dégen!»
Yuqiriqi xadim tehdit, aldash, azdurush qatarliq barliq wasitiler emelge ashmighandin kéyin qéyidashqa ötken. U özini bir yardem qilghuchi, dostluqni yetküzgüchi qiyapitide körsitip doq qilghan. U özining yaxshiliq qilish üchün köp tirishchanliq körsetkenlikini, emdi yardem qilmaydighanliqini, qarshi terep bash egmigüche qetiy alaqe qilmaydighanliqini tekitlep gépini üzgen.
Men tehditke uchrighanda
Hazir yawropadiki melum bir dölette yashawatqan ismini ashkarilashni xalimaydighan bir uyghur yéqinda xitay xadimlirining tehditige uchrighanliqini we shu chaghda qandaq tedbir qollanghanliqini sözlep berdi. Bu uyghurning qarishiche, mezkur dölette tehditke uchrighuchi tayinidighan qanun éniq bolsimu, uyghurlarning melum qilmasliqi seweblik ular qollanmaqchi bolghan qanuniy wasitimu emelge ashmasliqi mumkin iken.
Chetellerde xitay jasuslirining parakende qilishigha uchrawatqan bir uyghur yuqiriqigha oxshash qanuni yollargha murajiet qiliwatqan bolsimu, biz ziyaret qilmaqchi bolghan mutleq köp sanliq uyghurlar sükütni tallap ziyaretni qobul qilishni ret qildi.
Türkiyediki istratégiye mutexessisi doktor erkin ekrem, bu mesilini bir «psixik hujum» dep qaraydighanliqini bildürdi.
About Republic Of Uyghuristan
Uyghuristan Info 