Yéngisar Saghanda Az Dégende 4 Kishining «Terbiyelesh Merkizi» de Ölgenliki Ashkarilandi

Uyghur bowayning kocha charlawatqan xitay qoralliq eskerlirining yénidin ötüp kétiwatqan körünüshi. 2009-Yili 9-Iyul, ürümchi.

 AP

00:00/00:00

 

Yéqinda anglighuchilirimizdin biri radiyomizgha mektup yollap yéngisar nahiyesining saghan yézisidin «terbiyelesh merkizi» ge ketkenlerdin birqanchisining arqa-Arqidin ölgenlikini, ölgenlerdin birining 71 yashliq hesen imin dégen kishi ikenlikini melum qilghan idi.

Muxbirimizning yéngisar saghandiki saqchixanilardin ehwal igilishi netijiside saghanda 8‏-Aydin hazirgha qeder 3 ay ichide az dégende 4 kishining «terbiyelesh merkizi» de hayatidin ayrilghanliqi, ölgüchilerdin yene birining 60 nechche yashliq sawut raxman dégen kishi ikenliki ashkarilandi.

Radiomizgha kelgen mektupta yéngisardiki «yépiq terbiyelesh merkizi» ning sharaitining nacharliqi we rohiy bésim sewebidin «terbiyelesh merkezliri» de ölüm-Yétim weqeliri yüz bériwatqanliqi, dairilerning bu ehwalni jemiyetke tarqatmasliq heqqide ahalilerni agahlanduriwatqanliqi yézilghan.

Biz bu ehwalni éniqlash üchün aldi bilen yéngisarning yéngiyer saqchixanisigha téléfon qilduq. Saqchixana xadimi, yuqiriqi ehwalni ret qildi. Yéngisar bazarliq saqchixana xadimimu ehwal heqqide melumat bérilmidi.

Radiyomizgha kelgen mektupta «terbiyelesh merkizi» de ölgenlerdin birining 71 yashliq hesen imin dégen kishi ikenliki, uning bundin 10 yil burun bir oghlini yer asti diniy mektepke bergenliki üchün «yépiq terbiye» ge tutup kétilgenliki yézilghan.

Saghan yéza 1‏-Kent saqchixana xadimi hesen iminning 7‏-Kent ezasi ikenliki we buningdin 2 ay burun «terbiyelesh merkizi» de hayatidin ayrilghanliqini pash qildi.

Saghan saqchixana xadimi bolsa, saghanning 18‏-Kentidin bir kishining «terbiyelesh merkizi» de ölgenlikini bayan qildi. Yene éniqlashlirimiz dawamida saghanning 6‏-Kent saqchisi bashqa kentlerdin ölgenlerning kimlikini bilmeydighanliqini bayan qilish bilen birlikte öz kentidin sawut raxman isimlik bir kishining bu yil awghustta, yeni 2 ay burun «terbiyelesh merkizi» de ölgenlikini melum qildi.

Saghanning 15‏-Kent saqchi xadimi téxi ikki künning aldida 2‏-Kenttin bir kishining «terbiyelesh merkizi» de ölgenlikini éytti.

Yuqirida saqchixana xadimlirining éghizidin chiqqan bayanlargha asaslanghanda, radiyomizgha yollanghan mektuptiki uchurlarning asassiz emesliki, yéngisarning saghan yézisining özidinla yéqinqi üch ay ichide az dégende 4 kishining «terbiyelesh merkizi» de jan üzgenliki delillendi.

Melum bolushiche, yéngisarning saghan yézisida 21 kent, 101 mehelle, 23100 nopus bar iken./ shöhret hoshur

Munasiwetlik xewerler

• Qaraqash yawa yézisidiki saqchi xadimi: «yézimizda diniy zatlarning tengdin tolisi solaqta»
• Ahaliler: «yépiq terbiyelesh sewebidin xoten chong bazarda üchtin bir qisim dukanlar taqaldi»
• Xitay «terbiyilep özgertish sinipliri» ning chümbilini achti (2)
• Korlada 82 yashliq sabiq sékrétar, peyziwatta 64 yashliq sabiq oqutquchi yépiq «terbiye» de
• Xitay «terbiyelep özgertish sinipliri» ning chümbilini achti
• Qaraqashning yawa yézisida ige-Chaqisiz qalghan bir qisim balilar mektep we yesliler teripidin «béqiwélinghan»
• Ata-Anisi «terbiyelesh» ke élip kétilgen balilar dariltamlargha apirip bérilgen
• Qaraqashtiki kent sékrétari: «erler qamaqta, ayallirini aqsugha paxta tergili yolgha salduq»
• Qaraqash purchaqchi ahaliliri: mehellimizde erler asasen qalmidi, hemmisi «terbiyelesh» te
• Amanliq mudiri: chetelge chiqqanlar pushayman sözi yazghandin kéyin qoyup bérilidu

http://www.rfa.org/uyghur/xewerler/qanun/yepiq-terbiyelesh-10302017162217.html?encoding=latin